Әл-Фараби атындағы ҚазҰУ студенттеріне «Ұлттық қор – балаларға» жобасы бойынша түсіндіру жұмыстары жүргізілді

2026 жылғы 21 қыркүйек күні «Отбасы банк» АҚ қызметкерлері әл-Фараби атындағы Қазақ ұлттық университетінің Тарих, Филология және Журналистика факультеттеріне келіп, студенттер арасында «Ұлттық қор – балаларға» жобасы бойынша ақпараттық-түсіндіру жұмыстарын жүргізді.

Іс-шараның негізгі мақсаты – жастардың қаржылық сауаттылығын арттыру, мемлекеттік бағдарламалар туралы ақпараттандыру, сондай-ақ болашақта тұрғын үй жағдайын жақсарту мен білім алуға арналған қаржылық мүмкіндіктерді тиімді пайдалану жолдарын түсіндіру.

Кездесу барысында банк мамандары «Ұлттық қор – балаларға» жобасының мақсаты мен маңыздылығына тоқталып, оның жұмыс істеу тәртібі, қаражаттың жинақталу ерекшеліктері және оны пайдалану шарттары туралы жан-жақты ақпарат берді. Студенттерге жоба аясында қалыптасқан нысаналы жинақтарды тек заңнамада көзделген мақсаттарға, атап айтқанда, тұрғын үй жағдайын жақсартуға және білім беру ақысын төлеуге пайдалану мүмкіндіктері түсіндірілді.

Сонымен қатар «Отбасы банк» қызметкерлері студенттерге депозит ашу тәртібі бойынша практикалық көмек көрсетіп, қажетті рәсімдерді орындау жолдарын түсіндірді. Мамандар депозит ашуға қатысты қадамдар, қажетті құжаттар мен мәліметтер, сондай-ақ жинақ қаражатын мақсатты пайдалану ерекшеліктері жөнінде нақты бағдар берді. Студенттер өздеріне қажетті ақпарат алып, жеке сұрақтарын қойып, банк мамандарынан кеңес алу мүмкіндігіне ие болды.

Ақпараттық-түсіндіру жұмыстары барысында жастардың болашаққа қаржылық тұрғыдан жауапкершілікпен қарауының, жинақ мәдениетін қалыптастырудың және мемлекеттік бастамалардың мүмкіндіктерін тиімді пайдаланудың маңыздылығы атап өтілді. Мұндай кездесулер студенттердің қаржылық сауаттылығын арттырып қана қоймай, олардың білім алу мен тұрғын үй мәселелерін шешуге қатысты қолжетімді тетіктер туралы хабардарлығын кеңейтуге ықпал етеді.

Әл-Фараби атындағы Қазақ ұлттық университеті студенттердің әлеуметтік және қаржылық сауаттылығын арттыруға, олардың мемлекеттік бағдарламалар туралы ақпарат алуына және болашаққа қатысты саналы шешім қабылдауына бағытталған бастамаларды қолдауды жалғастырады.

Университет пен қаржы ұйымдары арасындағы осындай өзара іс-қимыл жастарға қажетті ақпаратты тікелей мамандардан алуға, практикалық кеңеске қол жеткізуге және жеке қаржылық жоспарлау дағдыларын дамытуға мүмкіндік береді.