Қытайтану кафедрасының студенттері, докторанттары мен оқытушылары «Қазақстан – Қытай» инвестициялық форумына қатысты

2026 жылғы 25 қыркүйекте Алматы қаласындағы Koktobe Hall алаңында «Қазақстан – Қытай» инвестициялық форумы өтті. Халықаралық деңгейдегі ірі іс-шараға Қазақстан Республикасының Президенті Қасым-Жомарт Тоқаев қатысты. Форумға Қазақстан мен Қытайдың мемлекеттік органдарының, іскерлік топтарының, жетекші корпорациялары мен даму институттарының өкілдері жиналды.

Форум жұмысына Қытайтану кафедрасының студенттері, докторанттары мен оқытушылары да белсенді қатысты. Студенттер үшін бұл іс-шара қытай тілін меңгеру деңгейін тәжірибе жүзінде қолдануға, кәсіби және мәдениетаралық коммуникация дағдыларын жетілдіруге мүмкіндік берген маңызды тәжірибелік алаңға айналды.

Кафедра студенттері форумды ұйымдастырушыларға Қытай Халық Республикасынан келген қонақтарды қарсы алу және сүйемелдеу, форум алаңында бағдарлануына көмектесу, қытайлық делегаттар мен ұйымдастырушылар арасындағы коммуникацияны қамтамасыз ету, сондай-ақ кәсіби аудармашыларға көмек көрсету бағыттарында қолдау көрсетті.

Қытай тілін меңгерген студенттердің халықаралық іскерлік іс-шара барысында тікелей практикалық жұмыс атқаруы олардың кәсіби құзыреттерін дамытуда ерекше маңызға ие. Олар ресми және іскерлік қарым-қатынастың ерекшеліктерімен танысып, қытайлық делегаттармен нақты коммуникациялық жағдайда жұмыс істеу тәжірибесін жинақтады.

Сонымен қатар, форумға кафедраның докторанттары мен оқытушыларының қатысуы да кәсіби және академиялық тұрғыдан маңызды болды. Іс-шара барысында Қазақстан мен Қытай арасындағы инвестициялық және экономикалық ынтымақтастықтың қазіргі бағыттарымен танысуға, жаңа кәсіби байланыстар орнатуға және екі ел арасындағы өзара іс-қимылдың практикалық қырларын зерделеуге мүмкіндік туды.

«Қазақстан – Қытай» инвестициялық форумы екі ел арасындағы сауда-экономикалық және инвестициялық ынтымақтастықты дамытуға арналған маңызды халықаралық алаң болды. Форум аясында көлік-логистика дәліздерін дамыту, өнеркәсіптік кооперация, терең өңдеу, цифрлық экономика және қаржы салаларындағы ынтымақтастық мәселелері талқыланды. Іс-шараға 600-ден астам делегат қатысты.

Қытайтану кафедрасы үшін осындай халықаралық іс-шараларға қатысу студенттердің теориялық білімін практикалық тәжірибемен ұштастыруға мүмкіндік береді. Қытай тілін, тарихын және мәдениетін терең меңгерумен қатар, болашақ мамандар үшін кәсіби аударма, іскерлік коммуникация және мәдениетаралық өзара түсіністік дағдыларын қалыптастырудың маңызы зор.

Форумға қатысу Қытайтану кафедрасының студенттері, докторанттары мен оқытушылары үшін кәсіби дамудың, жаңа тәжірибе жинақтаудың және Қазақстан мен Қытай арасындағы гуманитарлық әрі кәсіби байланыстарды нығайтуға үлес қосудың маңызды мүмкіндігі болды.