ТДМ № 5, 16: «Отбасындағы зорлық-зомбылық және сталкинг: алдын алу, қорғау және жауапкершілік» тақырыбында профилактикалық кездесу

       Әлеуметтік-тәрбие департаментінің ұйымдастыруымен «Отбасындағы зорлық-зомбылық және сталкинг: алдын алу, қорғау және жауапкершілік» тақырыбында Бостандық ауданы полиция басқармасының мамандарымен кездесу өтті. Іс-шараны өткізуге "Психологиялық қолдау" орталығы және "Инклюзивті орта" практикалық-ғылыми орталығы қолдау көрсетті.

          Кездесудің негізгі мақсаты – білім алушылардың құқықтық сауаттылығын арттыру, отбасындағы зорлық-зомбылық пен сталкингтің алдын алу, құқық бұзушылық белгілерін дер кезінде анықтау, сондай-ақ осындай жағдайларға тап болған адамдарға көмек көрсету жолдарын түсіндіру.

       Іс-шара барысында полиция басқармасының мамандары отбасындағы зорлық-зомбылықтың негізгі түрлері, оның жеке тұлғаның психологиялық және әлеуметтік жағдайына әсері, сталкинг ұғымы және оның қоғамдағы көріністері туралы ақпарат берді. Сонымен қатар адамның жеке шекарасын құрметтеу, қауіпсіз қарым-қатынас орнату, қорқыту, қудалау және психологиялық қысым көрсету жағдайларына бейжай қарамаудың маңыздылығы атап өтілді.

        Кездесу аясында зорлық-зомбылық пен сталкингке тап болған жағдайда қандай әрекеттер жасау керектігі, құқық қорғау органдарына жүгіну тәртібі, қолжетімді көмек алу жолдары және азаматтардың құқықтары мен қауіпсіздігін қорғау мәселелері қарастырылды. Қатысушыларға құқық бұзушылықтың алдын алу және қауіпті жағдайларда дұрыс шешім қабылдау жөнінде түсініктемелер берілді.

         Іс-шараның маңызды бағыттарының бірі – психологиялық қолдау мен қауіпсіз, инклюзивті ортаны қалыптастыру мәселесі болды. Психологиялық көмек орталығы мен Инклюзивті орта практикалық-ғылыми орталығының қолдауы осындай кездесулердің білім алушылардың эмоционалдық саулығын нығайтуға, өзара құрмет мәдениетін дамытуға және әрбір адамның қауіпсіздігін қамтамасыз етуге бағытталған маңызын айқындайды.

      Мұндай кездесулер құқықтық мәдениетті қалыптастыруға, зорлық-зомбылыққа төзбеушілік қағидатын нығайтуға және қоғамда қауіпсіз әрі құрметке негізделген қарым-қатынас орнатуға ықпал етеді. Сонымен қатар білім алушылардың құқықтары мен жауапкершілігін түсінуіне, қиын жағдайларда тиісті көмекке жүгіну жолдарын білуіне мүмкіндік береді.

         Әлеуметтік-тәрбие департаменті, Психологиялық қолдау орталығы және Инклюзивті орта практикалық-ғылыми орталығы осындай профилактикалық іс-шараларды қолдау арқылы білім алушылардың құқықтық сауаттылығын арттыруға, психологиялық әл-ауқатын нығайтуға және қауіпсіз білім беру ортасын қалыптастыруға бағытталған жұмыстарды жүзеге асыруға атсалысады.