ФИЗИКА-ТЕХНИКАЛЫҚ ФАКУЛЬТЕТІНДЕ БІЛІМ КҮНІНЕ АРНАЛҒАН ІС-ШАРА ӨТТІ

1 қыркүйек күні Әл-Фараби атындағы Қазақ ұлттық университетінің Физика-техникалық факультетінде Білім күніне және жаңа оқу жылының басталуына арналған мерекелік іс-шара өтті.

Іс-шара Әл-Фараби атындағы ҚазҰУ Басқарма Төрағасы – Ректоры, академик Жансейіт Түймебаевтың университет білім алушыларына арналған құттықтауымен басталды.

Бірінші курс студенттері үшін факультет деканының дәстүрлі дәріс-презентациясы ұйымдастырылды. Кездесу барысында студенттерге Физика-техникалық факультетінің құрылымы, білім беру бағдарламалары, оқу және ғылыми қызметтің негізгі бағыттары таныстырылды.

Іс-шара барысында кафедра меңгерушілері, сондай-ақ деканның ғылыми-инновациялық қызмет және халықаралық байланыстар жөніндегі, академиялық мәселелер жөніндегі және әлеуметтік-тәрбие жұмысы жөніндегі орынбасарлары таныстырылды. Бірінші курс студенттеріне кафедралардың қай аудиторияларда орналасқаны көрсетіліп, оқу үдерісі, ғылыми қызмет, халықаралық бағдарламалар және студенттік өмір мәселелері бойынша кімге жүгінуге болатыны түсіндірілді.

Кездесуде 2026 жылғы қабылдау науқанының қорытындыларына ерекше назар аударылды.

Қабылдау нәтижесі бойынша Физика-техникалық факультетінің 13 білім беру бағдарламасына барлығы 367 студент қабылданды.

Негізгі білім беру бағыттары бойынша:

• «Физика» – 124 студент;

• «Коммуникациялар және коммуникациялық технологиялар» – 83 студент;

• «Материалтану және технологиялар» – 62 студент;

• «Электротехника және энергетика» – 55 студент;

• «Электротехника және автоматтандыру» – 23 студент;

• «Стандарттау, сертификаттау және метрология» – 20 студент.

2026 жылы факультет қатары Ұлттық бірыңғай тестілеуден жоғары нәтиже көрсеткен талапкерлермен толықты.

Ең жоғары нәтижелер көрсеткен студенттер қатарында:

• Кеңес Айбат Қанатұлы – «Техникалық физика» білім беру бағдарламасы, 134 балл;

• Капанов Ернур Алиевич – «Ядролық физика», 134 балл;

• Кабидуллов Мансұр Танатұлы – «Ядролық физика», 132 балл;

• Рамазанұлы Елжан – «Электроэнергетика», 129 балл;

• Нұрлыбекұлы Данияр – «Ядролық физика», 129 балл.

ҰБТ нәтижесі бойынша 130-дан жоғары балл жинаған студенттерге Физика-техникалық факультетінің деканы, физика-математика ғылымдарының кандидаты, профессор Нұрзада Бейсен Әл-Фараби атындағы Қазақ ұлттық университетінің брендтік символикасы бар естелік сыйлықтар табыстады.

2026 жылғы қабылдау науқанының тағы бір маңызды нәтижесі – факультетке 39 «Алтын белгі» иегерінің оқуға түсуі.

«Алтын белгі» иегерлері «Радиотехника, электроника және телекоммуникациялар», «Материалтану және жаңа материалдар технологиясы», «Киберфизика», «Техникалық физика», «Физика», «Электроэнергетика», «Стандарттау және сертификаттау», «Өнеркәсіптік электроника және басқару жүйелері», «Физика және нанотехнология» және «Ядролық физика» білім беру бағдарламаларын таңдады.

«Алтын белгі» иегерлерінің ең көп саны «Физика» білім беру бағдарламасына қабылданды – 8 адам. «Радиотехника, электроника және телекоммуникациялар» бағдарламасын 6, «Стандарттау және сертификаттау» бағдарламасын 5, «Электроэнергетика» бағдарламасын 4 талапкер таңдады.

ҰБТ-ның жоғары нәтижелері мен 39 «Алтын белгі» иегерінің факультетті таңдауы талапкерлердің Физика-техникалық факультетінің білім беру бағдарламаларына, сондай-ақ физика, инженерия және заманауи технологиялар бағыттарына тұрақты қызығушылық танытып отырғанын көрсетеді.

Кездесу барысында бірінші курс студенттеріне ғылыми жобаларға қатысу, зерттеу зертханаларында жұмыс істеу, академиялық ұтқырлық бағдарламаларына, халықаралық тағылымдамаларға, ғылыми конференциялар мен олимпиадаларға қатысу мүмкіндіктері туралы да ақпарат берілді.

Жалпы дәріс-презентация аяқталғаннан кейін студенттер өз кафедраларына бөлініп, білім беру бағдарламаларымен, профессор-оқытушылар құрамымен және оқу үдерісін ұйымдастыру ерекшеліктерімен танысуды жалғастырды.

Іс-шара соңында бірінші курс студенттеріне оқуда табыс, университеттің ғылыми және қоғамдық өміріне белсенді қатысу және жаңа жетістіктер тіленді.

Физика-техникалық факультетінің студенттері мен оқытушыларын Білім күнімен және жаңа оқу жылының басталуымен құттықтаймыз!