Журналистика факультеті журналист Иван Червинскиймен жаңа бірлескен жобаларды талқылады

3 қыркүйекте Журналистика факультетіне журналист, «Алға Қазақстан» медиажобасының авторы Иван Червинский келді. Бұған дейін «Алға Петербург» атауымен жұмыс істеген жоба Қазақстанның мәдениетін, дәстүрі мен азаматтарының жетістіктерін халықаралық деңгейде танытуға бағытталған. Кездесу барысында факультеттің білім беру бағыттары мен телестудиясының мүмкіндіктері таныстырылып, болашақтағы бірлескен жұмыс бағыттары талқыланды.

Иван Червинский факультеттің тыныс-тіршілігімен, білім беру бағдарламаларымен және студенттерге ұсынылатын кәсіби мүмкіндіктермен танысты. Студенттер телевизиялық және мультимедиялық өнім дайындаудың қыр-сырын меңгеріп, заманауи контент жасау құралдарымен жұмыс істеп, өздерінің шығармашылық медиажобаларын жүзеге асыра алатын факультеттің телестудиясына да ерекше назар аударылды.

Кездесуде журналистің оқу үдерісіне еркін тыңдаушы ретінде қатысу мүмкіндігі де сөз болды. Білім беру үдерісіне медиа саласында осындай тәжірибесі бар мамандардың болуы студенттердің кәсіби дағдыларын жетілдіруге ықпал етеді. Практик мамандармен тікелей пікір алмасу арқылы студенттер медиадағы заманауи үрдістерді жақсырақ түсініп, алған теориялық білімдерін нақты кәсіби міндеттермен ұштастыра алады.

Кездесу тәжірибе алмасуға жол ашып, журналистика факультеті мен медиа саласы өкілдері арасындағы өзара байланысты одан әрі дамытуға негіз болды.