Васэда университетінің делегациясы Алматы қаласындағы мүмкіндігі шектеулі балалардың ата-аналар қауымдастығына барды

2026 жылғы 7 қыркүйекте Қазақстанға Жапонияның Васэда университетінің 14 адамнан тұратын делегациясы ресми сапармен келді. Делегация құрамына психология, әлеуметтік медицина, инженерия және денсаулық сақтау сияқты әртүрлі мамандықтар бойынша білім алып жүрген бакалавриат, магистратура және докторантура студенттері кірді. Делегацияны Васэда университетінің профессоры Ацуси Огихара басқарды.

Сапар аясында жапондық студенттер мен оқытушылар әл-Фараби атындағы ҚазҰУ Шығыстану факультетінің Қиыр Шығыс кафедрасының оқытушылары мен студенттерімен бірге мүмкіндігі шектеулі балалардың ата-аналар қауымдастығына барды.

Сапар барысында қатысушылар Қауымдастықтың қызметімен, инфрақұрылымымен және материалдық-техникалық жабдықталуымен танысты. Балалардың, оның ішінде балалар церебралды сал ауруы бар балалардың дамуы мен оңалуына арналған бөлмелер мен мүмкіндіктерге ерекше назар аударылды. Қатысушылар балалардың сабақтары, әлеуметтік бейімделуі және жан-жақты дамуы үшін жасалған жағдайлармен танысты.

Қауымдастық директорымен мазмұнды кездесу өтіп, оның барысында жапондық қонақтар жүзеге асырылып жатқан бағдарламалар, қызметтің негізгі бағыттары және балалар мен олардың ата-аналары үшін ұйымдастырылатын түрлі іс-шаралар туралы ақпарат алды. Қатысушылар ерекше қажеттіліктері бар балаларды қолдау тәсілдері мен одан әрі ынтымақтастық мүмкіндіктері жөнінде пікір алмасты.

Кездесу барысында Асфендияров атындағы ҚазҰМУ өкілдерімен және оңалту саласының мамандарымен де пікір алмасу өтті. Қонақтар заманауи оңалту әдістері, сондай-ақ түзету және дамыту жұмыстарының ұйымдастырылуы туралы толық ақпарат алды.

Сапар Жапония мен Қазақстан университеттері арасындағы кәсіби тәжірибе алмасуға және ынтымақтастықты нығайтуға ықпал еткен жемісті кездесу болды.