Қауіпсіз түсірілім алаңы немесе Журналистің қауіпсіздігі: төтенше жағдайдағы әрекет

24.09.2026 күні «Баспасөз және электронды БАҚ» кафедрасының оқытушысы, өнертану ғылымдарының магистрі, кинотанушы Абдулла Нұргүл Сәрсенбайқызының жетекшілігімен студенттер арасында «Қауіпсіз түсірілім алаңы немесе Журналистің қауіпсіздігі: төтенше жағдайдағы әрекет» атты тәжірибелік іс-шара ұйымдастырылды.

Іс-шараның негізгі мақсаты – білім алушыларға түсірілім алаңындағы қауіпсіздік талаптарын түсіндіру, журналистік және аудиовизуалды материал дайындау кезінде туындауы мүмкін қауіп-қатерлерді алдын ала бағалауға үйрету, сондай-ақ төтенше жағдай кезінде дұрыс әрі жедел әрекет ету дағдыларын қалыптастыру.

Түсірілім үдерісі шығармашылық ізденіспен қатар, жоғары жауапкершілікті де талап етеді. Әсіресе журналистер, режиссерлер, операторлар мен шығармашылық топ мүшелері түрлі локацияларда жұмыс істеген кезде қоршаған ортаның ерекшелігін, адамдар қозғалысын, техникалық және табиғи қауіп факторларын ескеруі қажет. Осыған байланысты іс-шара барысында студенттерге түсірілім басталғанға дейін локацияны алдын ала зерттеу, ықтимал қауіптерді анықтау, қауіпсіз қозғалыс бағытын белгілеу және төтенше жағдай туындаған кезде түсірілімді тоқтатып, қауіпсіздік шараларына басымдық беру қажеттігі түсіндірілді.

Тәжірибелік бөлімде білім алушылар «Фараби қалашығындағы» әртүрлі локациялармен танысты. Әрбір кеңістіктің түсірілім жасауға қолайлылығы мен қауіпсіздігі жеке қарастырылып, белгілі бір локацияда қандай жанрдағы материал түсіруге болатыны, камераны орналастыру кезінде нені ескеру қажеттігі және түсірілім тобының қауіпсіз қозғалысын қалай ұйымдастыру керектігі талқыланды.

Сонымен қатар студенттерге университет аумағындағы қолжетімді локациялардың көркемдік мүмкіндіктерін тиімді пайдалану жолдары көрсетілді. Бір кеңістікті әртүрлі ракурс, кадр композициясы және түсіру тәсілдері арқылы бірнеше мағыналық контексте қолдануға болатыны түсіндірілді. Бұл білім алушыларға алдағы оқу және шығармашылық жобаларында алыс немесе қауіп деңгейі жоғары локацияларды іздемей-ақ, қауіпсіз ортада сапалы аудиовизуалды материал дайындауға мүмкіндік береді.

Университет аумағында түсірілім жүргізу студенттердің қауіпсіздігін қамтамасыз етумен қатар, шығармашылық жобаларды ұйымдастыруға кететін уақыт пен қаржылық шығынды азайтуға мүмкіндік береді. Білім алушы локация іздеуге артық уақыт жұмсамай, қолжетімді кеңістіктің визуалды және драматургиялық әлеуетін ашуға назар аударады.

Іс-шара барысында «сәтті кадрдан бұрын – қауіпсіздік» қағидатына ерекше мән берілді. Қандай да бір ерекше немесе әсерлі кадр алу қажеттілігі адамның өмірі мен денсаулығына қауіп төндірмеуі тиіс. Төтенше жағдай туындаған жағдайда студент ең алдымен өзінің және түсірілім тобы мүшелерінің қауіпсіздігін қамтамасыз етіп, содан кейін ғана кәсіби міндеттерін жалғастыруы қажет.

Іс-шара нәтижесінде білім алушылар түсірілім алаңын тек шығармашылық кеңістік ретінде ғана емес, алдын ала жоспарлауды және қауіпсіздік талаптарын сақтауды қажет ететін кәсіби орта ретінде қарастырудың маңызын түсінді. Мұндай тәжірибелік жұмыстар болашақ журналистер мен аудиовизуалды сала мамандарының кәсіби жауапкершілігін қалыптастырып, нақты жұмыс жағдайында дұрыс шешім қабылдау дағдыларын дамытуға бағытталған.