Университеттен халықаралық тәжірибеге дейін: халықаралық заңгер мансабы туралы қонақ дәрісі

2026 жылғы 1 қазанда Халықаралық қатынастар факультетінде «Халықаралық заңгердің мансабы: университеттен шетелдік инвесторлармен келіссөздерге дейін» тақырыбында қонақ дәрісі өтті.

Дәріс спикері — Слета Виктория Александровна, RSP International Uzbekistan компаниясының Бас директоры, 2018 жылғы «Халықаралық құқық» мамандығының түлегі.

Кездесу халықаралық заңгердің кәсіби мансабының қалыптасуына және қазіргі халықаралық заң тәжірибесінде табысты жұмыс істеу үшін қажетті негізгі құзыреттерге арналды.

Виктория Александровна студенттермен өзінің кәсіби тәжірибесімен бөлісіп, халықаралық заңгер қызметінің әртүрлі бағыттары туралы айтып берді. Олардың қатарында бизнесті, инвестицияларды және халықаралық шарттарды құқықтық сүйемелдеу, жеке клиенттермен, мемлекеттік органдармен және халықаралық ұйымдармен жұмыс істеу бағыттары қамтылды.

Дәрістің жеке бөлімі клиенттермен келіссөздер жүргізу және due diligence рәсімін өткізуге арналды. Практикалық кейс барысында студенттер аграрлық бизнеске ықтимал инвестиция салу жағдайын талдап, негізгі құқықтық тәуекелдерді, қажетті құжаттарды және клиентке ұсыныс бермес бұрын халықаралық заңгер анықтауы тиіс мәселелерді қарастырды.

Сонымен қатар халықаралық жеке құқық саласындағы практикалық мәселелерге: салықтық резиденттікке, шарттарға, әртүрлі юрисдикциялардан алынатын табыстарға, мұрагерлікке және қолданылатын құқыққа назар аударылды.

Жас заңгердің кәсіби қасиеттері де ерекше талқыланды. Олардың қатарында дәлдік, жауапкершілік, мәселені ғана емес, оның ықтимал шешімін де көре білу, маңызды тәуекелдерді теориялық тәуекелдерден ажырату және клиентке берілетін ұсынымдарды нақты әрі түсінікті тұжырымдау қабілеті атап өтілді.

Виктория Александровна халықаралық заңгердің кәсіби дайындығы диплом алғаннан кейін емес, университетте оқу кезеңінен бастап қалыптасатынын атап өтті. Студенттік жылдары тағылымдамадан өтуге, практикалық және зерттеу жобаларына қатысуға, тілдік және коммуникативтік дағдыларды дамытуға, кәсіби іс-шараларға қатысуға және кәсіби байланыстар желісін қалыптастыруға мүмкіндік іздеудің маңызы зор.

Кездесу соңында студенттерге алдағы 12 айға арналған практикалық бағдар ұсынылды: ғылыми мақалалар мен жобалар жазу, нақты шарттарды оқу және талдау, іскерлік ағылшын тілін жетілдіру, тағылымдамалар мен басқа да жобаларға қатысу, көпшілік алдында сөйлеу және келіссөздер жүргізу дағдыларын дамыту.

Мұндай кездесулер студенттерге университеттегі білім мен нақты кәсіби тәжірибенің арасындағы байланысты түсінуге, сондай-ақ халықаралық заңгердің кәсіби дамуының ықтимал бағыттарымен танысуға мүмкіндік береді.

Мазмұнды кездесуі, ашық кәсіби диалогы және халықаралық құқық саласында болашақ мамандарды дамытуға қосқан үлесі үшін Виктория Александровна Слетаға алғысымызды білдіреміз!