Әл-Фараби атындағы ҚазҰУ-да Қазақстан Республикасының жаңа Конституциясына арналған халықаралық ғылыми-практикалық конференция өтті.

Әл-Фараби атындағы Қазақ ұлттық университеті заң факультетінің теория және мемлекет пен құқық тарихы, конституциялық және әкімшілік құқық кафедрасы «Қазақстан Республикасының жаңа Конституциясы: жаңа құндылықтар, жаңа сын-қатерлер, болашақ ұрпақ алдындағы жауапкершілік» тақырыбында халықаралық ғылыми-практикалық конференция ұйымдастырып, өткізді.
Ауқымды ғылыми іс-шара мемлекеттік органдар, ғылыми қоғамдастық, сот жүйесі, құқық қорғау органдары өкілдерін, Қазақстан мен шетелдің жетекші университеттерінің басшыларын, сондай-ақ конституциялық құқық саласындағы белгілі ғалымдар мен сарапшыларды біріктірген маңызды диалог алаңына айналды.
Пленарлық отырыс аясында Қазақстан мен Өзбекстанның жетекші ғалымдары конституциялық құндылықтар, ұлттық қауіпсіздік, мемлекеттік басқару, цифрландыру, адам құқықтарын қорғау, халықаралық ынтымақтастық және конституциялық заңнаманы одан әрі жетілдіру мәселелеріне арналған баяндамалар жасады.
Конференцияның ерекше маңыздылығын елдің жетекші жоғары оқу орындары басшыларының, Қазақстан Республикасы Президенті жанындағы Ұлттық ғылым академиясы өкілдерінің, заңгерлер қауымдастығының, профессор-оқытушылар құрамының, жас ғалымдардың, докторанттардың, магистранттар мен студенттердің қатысуы айқындады.
Конференцияны өткізу теория және мемлекет пен құқық тарихы, конституциялық және әкімшілік құқық кафедрасының отандық заң ғылымын дамытуға, халықаралық ғылыми ынтымақтастықты нығайтуға және Қазақстан Республикасының жаңа Конституциясын іске асыру мәселелері бойынша кәсіби пікірталас алаңын қалыптастыруға қосқан маңызды үлесі болды.