Метеорология және гидрология кафедрасы «Қалдықсыз факультет» экологиялық акциясын өткізді

2026 жылғы 8-9 қазанда әл-Фараби атындағы Қазақ ұлттық университетінің география және табиғатты пайдалану факультетінде «Таза Қазақстан» жобасы аясында «Қалдықсыз факультет» экологиялық акциясы өтті. Акцияны метеорология және гидрология кафедрасы ұйымдастырды. Бастама қалдықтарды бөлек жинау мәдениетін дамытуға, ресурстарды ұқыпты пайдалануға және қоршаған ортаға жауапкершілікпен қарауға бағытталды.

Екі күн бойы студенттер қайта өңдеуге арналған қайталама шикізатты әкеліп, түрлері бойынша сұрыптады. Акция қатысушыларға қалдықтар көлемін азайтуға және табиғи ресурстарды сақтауға нақты үлес қосуға мүмкіндік берді.

Қалдықтарды бөлек жинауға арналған контейнерлерді Recycle Birge командасы ұсынды. Метеорология және гидрология кафедрасы бастамаға қолдау көрсетіп, акцияны өткізуге көмектескені үшін командаға алғыс білдіреді.
Іс-шараны ұйымдастыруға және өткізуге метеорология және гидрология кафедрасының аға кураторы Ахметова Р.Е. және аға оқытушысы Садуокасова М.Т. жауапты болды.

Екі күннің қорытындысы бойынша қайта өңдеуге тапсыру үшін 4 қап пластик, жарты қап металл, жарты қап шыны және 3 қорап макулатура жиналды. Сонымен қатар қатысушылар 3 қорап кітап әкелді. Бұл кітаптар кітапханаларға беріліп, студенттерге таратылады.

Бастама БҰҰ-ның 12-ші Тұрақты даму мақсаты — «Жауапты тұтыну және өндіріс» аясында жүзеге асырылды. Студенттердің бірлескен іс-әрекеті күнделікті тұтыну әдеттерін өзгерту арқылы қоршаған ортаға түсетін жүктемені азайтуға болатынын көрсетті. Мұндай тәжірибе жастардың экологиялық жауапкершілігін нығайтып, табиғатты қорғауға саналы түрде қатысуына жол ашады.
Ортақ іске үлес қосқан барлық қатысушыларға алғыс білдіреміз! Осындай бастамалар қалдықтарды бөлек жинау мен заттарды қайта пайдалануды университеттің күнделікті өмірінің бір бөлігіне айналдыруға көмектеседі.