Тұрақты болашақ жолында: Әл-Фараби атындағы ҚазҰУ ғалымдары Бұхарадағы халықаралық форумда

Заманауи университет тек академиялық білім мен ілім ордасы ғана емес, бүгінде ол тәжірибелік өзгерістердің қуатты драйвері, экологиялық мәдениеттің орталығы және «жасыл» экономика үшін кадрлар даярлайтын ұстахана. Бұл идея 2026 жылдың 19–20 қазанында Өзбекстандағы Бұхара мемлекеттік университетінде өткен «Жерге орналастыру, қоршаған орта және қатты қалдықтар: Орталық Азиядағы білім беру және бизнес» атты халықаралық LESLIE SLM2026 ғылыми конференциясының басты өзегіне айналды. Ауқымды шара Еуропалық Одақ қаржылай қолдайтын беделді Erasmus+ Leslie халықаралық жобасы айналасында ұйымдастырылды. Форум Өзбекстан, Қазақстан, Испания, Италия, Кипр, Иран, Түркия және Әзірбайжан елдерінің жетекші зерттеушілерін, экология сарапшыларын, бизнес өкілдері мен тәжірибе мамандарын бір алаңға біріктірді.

Әл-Фараби атындағы Қазақ ұлттық университетінің делегациясы халықаралық деңгейде жоғары кәсіби біліктілігін көрсетті. Жылуфизика және техникалық физика кафедрасы меңгерушісінің орынбасарлары Жанар Шортанбаева мен Әлібек Жақыпов «ESG қағидаттары негізінде университетті трансформациялау» атты маңызды баяндама жасады. Олар өз сөзінде жетекші қазақстандық жоғары оқу орнының қызметіне экологиялық, әлеуметтік және басқару стандарттарын енгізудің нақты қадамдарын жан-жақты түсіндіріп берді. Бұл сапалы білім беру арқылы жаңа буын мамандарын даярлауға бағытталған сапалы білімді қамтамасыз ету (ТДМ 4) қағидаттарымен толық үндеседі.

Сондай-ақ Зульфия Кайназарованың (Green University) және ҚазҰУ зерттеушілерінің өңірлік білім беру кейстеріне «жасыл» экономика мен қалдықтарды басқару тәсілдерін енгізуге бағытталған бірлескен жұмысы қатысушылардың ерекше назарын аударды. Бұл бағыт өндіріс пен тұтынудағы ресурстарды тиімді үнемдеуге жауапты тұтыну және өндіріс (ТДМ 12) қағидаттарын орнықтыруға ықпал етеді.

Конференция бағдарламасы бес негізгі тақырыптық бағытты қамтыды: жер ресурстарын тұрақты басқару, циркулярлық экономика, азық-түлік қауіпсіздігі, су ресурстары және климаттың өзгеруіне қарсы күрес. Өңірдегі экологиялық тәуекелдерді талдау және агротехнологияларды қолдану климаттың өзгеруіне қарсы күрес (ТДМ 13) міндеттерімен тығыз байланысты. Қатысушылардың Бұхарадағы Varnet жылыжай кешені мен ботаникалық бағына жасаған сапары озық тәжірибелерді көруге жол ашты.

Осындай ауқымды халықаралық диалог мемлекеттер мен университеттер арасындағы тұрақты даму үшін серіктестік (ТДМ 17) байланыстарын нығайтып, өңірдің тұрақты болашағын қалыптастыруға сүбелі үлес қосады.