Цифрлық дәуірдегі конституциялық құқықтар мен бостандықтар мәселелері талқыланды.

2026 жылғы 20 қазанда сағат 11:00-де әл-Фараби атындағы Қазақ ұлттық университеті заң факультетінің №4 залында «Цифрлық дәуірдегі конституциялық құқықтар мен бостандықтар» тақырыбында дөңгелек үстел өтті.

Іс-шара Республика күні қарсаңында Қазақстан Республикасы Конституциясының ережелерін түсіндіруге және азаматтардың құқықтық сауаттылығын арттыруға арналған онкүндік аясында ұйымдастырылды. Ұйымдастырушы — заң факультетінің Мемлекет және құқық теориясы мен тарихы, конституциялық және әкімшілік құқық кафедрасы. Модератор – заң ғылымдарының докторы, профессор Ж.А. Кегембаева. Дөңгелек үстелге заң факультетінің екінші курс студенттері қатысты. Қатысушылардың жалпы саны жүзге жуық адамды құрады.

Іс-шара Біріккен Ұлттар Ұйымының №16 «Бейбітшілік, әділдік және тиімді институттар» Тұрақты даму мақсатына, атап айтқанда, ақпаратқа қол жеткізуді қамтамасыз ету және негізгі бостандықтарды қорғау жөніндегі 16.10 міндетіне сәйкес келеді.

Дөңгелек үстелдің мақсаты — Конституцияда бекітілген құқықтар мен бостандықтардың мазмұнын түсіндіру, оларды цифрлық ортада жүзеге асыру және қорғау мәселелерін талқылау, сондай-ақ болашақ заңгерлердің құқықтық мәдениетін дамыту.

Іс-шара барысында заң алдындағы теңдік, жеке басқа қол сұғылмаушылық, сөз бостандығы және ақпаратқа қол жеткізу құқығы мәселелері қарастырылды. Дербес деректерді қорғауға, жеке өмір құпиялылығын қамтамасыз етуге, цифрлық бақылаудың құқықтық шектеріне және киберқауіпсіздікке ерекше назар аударылды.

Талқылаудың негізгі бағыттарының бірі цифрлық технологияларды қолдану жағдайында адам құқықтарының сақталуын қамтамасыз ету болды. Ақпаратты жинау, өңдеу және тарату кезінде құқықтық талаптарды сақтау, электрондық сервистерді пайдалану барысында дербес деректерге жауапкершілікпен қарау және бұзылған құқықтарды қорғау тетіктерін білу мәселелерінің маңызы атап өтілді.

Дөңгелек үстел студенттердің конституциялық құқық саласындағы білімін практикалық мәселелермен байланыстыруға, құқықтық талдау және дәлелді пікір білдіру дағдыларын дамытуға бағытталды. Іс-шара кафедраның Республика күні қарсаңындағы құқықтық ағарту жұмысының бір бөлігі ретінде өткізілді.

#ЗаңФакультеті #Конституция #АдамҚұқықтары #ЦифрлықҚұқықтар #ҚұқықтықАғарту #ҚұқықтықМәдениет#SDG #SustainableDevelopment #THEImpact #KazNU #SDG_KazNU #SustainableKazNU