ҚазҰУ докторанттары регенеративті туризм жөніндегі халықаралық семинарда баяндама жасады

2026 жылғы 5 қарашада әл-Фараби атындағы Қазақ ұлттық университетінің рекреациялық география және туризм кафедрасының екі докторанты «Регенеративті туризм саласындағы білім беру, климаттың өзгеруіне бейімделу және өңірлік перспективалар» атты халықаралық жобалық семинарда баяндама жасады.

Семинарды ҚазҰУ-дың Тұрақты даму бойынша ЮНЕСКО кафедрасы Германияның академиялық алмасу қызметі (DAAD) қаржыландыратын «Регенеративті туризм саласындағы білім беруді дамыту: Орталық Азия мен Оңтүстік Кавказда климаттың өзгеруіне бейімделу бойынша трансұлттық университеттік әріптестік» жобасы аясында ұйымдастырды.

Саткали Илан Қуанышқызы «Жетісу өңіріндегі регенеративті туризмді қолдау үшін қонақжайлылық саласындағы орнықты тәжірибелерді енгізу» тақырыбында баяндама жасады. Баяндамада Жетісу өңірінің қонақжайлылық кәсіпорындарына орнықты тәжірибелерді енгізу мүмкіндіктері қарастырылды. Мұндай тәжірибелер су мен энергияны үнемдеуге, қалдық көлемін азайтуға және жергілікті жеткізушілермен жұмыс істеуге мүмкіндік береді. Бұл бағыттар БҰҰ-ның жауапты тұтыну мен өндіруге (ТДМ 12) және лайықты еңбек пен экономикалық өсуге (ТДМ 8) қатысты мақсаттарымен үндеседі.

Сержанұлы Даниел «Туристік дестинацияларды басқару және регенеративті туризм: Қазақстан мен Жапония тәжірибесі» тақырыбында сөз сөйледі. Екі елдің тәжірибесін салыстыру табиғи ресурстарды қорғауды, жергілікті қауымдастықтардың мүдделерін және климаттық тәуекелдерді туристік дестинацияларды басқаруда қалай ескеруге болатынын талқылауға негіз болды. Бұл мәселелер климаттың өзгеруіне бейімделу міндеттерімен (ТДМ 13) байланысты.

Семинар аясындағы тәжірибе алмасу өңірлік зерттеу нәтижелерін туризм саласындағы білім беруде қолдануға және университеттер арасындағы ынтымақтастықты нығайтуға мүмкіндік береді. Осы тұрғыдан семинар сапалы білім беру (ТДМ 4) және тұрақты даму жолындағы әріптестік (ТДМ 17) мақсаттарымен де сабақтас.