Конституция - Қазақстан Республикасының жаңа азаматтық заңнамасын дамытудың негізі ретіндегі

2026 жылғы 10 қарашада әл-Фараби атындағы Қазақ ұлттық университетінің заң факультетінде «Конституция -  Қазақстан Республикасының жаңа азаматтық заңнамасын дамытудың негізі» тақырыбында ғылыми-практикалық дөңгелек үстел өтті. Іс-шараны азаматтық құқық, азаматтық іс жүргізу және еңбек құқығы кафедрасы ұйымдастырды. Дөңгелек үстел гибридті форматта өткізіліп, оған Қазақстан, Ресей және Өзбекстанның ғылыми қоғамдастығының, мемлекеттік органдарының, сот жүйесінің және заң практикасындағы өкілдері қатысты.

Іс-шараның өзектілігі Қазақстан Республикасындағы конституциялық және заңнамалық жаңғыру үдерістерімен байланысты. Қазақстан Республикасының жаңа Конституциясының қабылдануы және Мемлекет басшысының 2026 жылғы 28 қазандағы Жолдауында жаңа Азаматтық кодексті әзірлеу міндетінің белгіленуі азаматтық заңнаманы дамытудың алдағы бағыттарын, оның конституциялық қағидаттар мен қазіргі қоғамдық қатынастарға сәйкестігін ғылыми тұрғыдан зерделеу қажеттілігін айқындайды.

Дөңгелек үстелдің модераторы әл-Фараби атындағы ҚазҰУ Басқарма Төрағасы – Ректорының кеңесшісі, заң ғылымдарының докторы, профессор Е.Э. Дүйсенов болды. Қатысушыларға әл-Фараби атындағы ҚазҰУ Басқарма Төрағасы – Ректоры Ж.Қ. Түймебаев құттықтау сөз сөйледі. Сондай-ақ Omir Innovation University президенті, заң ғылымдарының докторы, профессор Ө.Ш. Жалаири және әл-Фараби атындағы ҚазҰУ заң факультетінің деканы, заң ғылымдарының кандидаты, профессор У.А. Ахатов дөңгелек үстел жұмысына сәттілік тілеп, құттықтау сөздерін арнады. Азаматтық құқық, азаматтық іс жүргізу және еңбек құқығы кафедрасының меңгерушісі, профессор Т.Т. Балашов та қатысушыларға ізгі тілегін білдірді. Сөз сөйлеушілер ұлттық заңнаманы жетілдіруде ғылыми диалог пен заң қоғамдастығының қатысуының маңыздылығын атап өтті.

Ғылыми бағдарлама аясында жаңа Азаматтық кодексті әзірлеудің тұжырымдамалық тәсілдері, меншік құқығының конституциялық кепілдіктері, азаматтық құқықтарды қорғау, заң ғылымының заңнаманы дамытудағы рөлі, сондай-ақ цифрландыру мен инновациялардың азаматтық-құқықтық қатынастарға ықпалы талқыланды.

Дөңгелек үстел жұмысына ғылыми және сарапшылық қоғамдастықтың жетекші өкілдері, сондай-ақ заң практикасымен айналысатын мамандар қатысты. Қазақстан Республикасы Конституциялық Сотының судьясы, заң ғылымдарының докторы, профессор А.Е. Жатканбаева, әл-Фараби атындағы ҚазҰУ профессоры, заң ғылымдарының докторы А.С. Ибраева, Ташкент мемлекеттік заң университетінің профессоры, заң ғылымдарының докторы Омонбой Окюлов, В.М. Лебедев атындағы Ресей мемлекеттік әділет университетінің азаматтық құқық кафедрасының меңгерушісі, заң ғылымдарының докторы, доцент А.А. Ананьева, Сүлейман Демирел атындағы университеттің қауымдастырылған профессоры, PhD докторы М.А. Естемиров, сондай-ақ «BAYTAQ» Қазақстанның жасылдар партиясы Алматы қалалық филиалының төрағасы Алма Қараш баяндама жасады. Қатысушылар меншік құқығының конституциялық кепілдіктері, білім мен ғылымды дамыту, азаматтық және корпоративтік заңнаманы жетілдіру, азаматтық айналымды цифрландыру және құқықтық жүйені жаңғырту мәселелері бойынша ғылыми және практикалық тәсілдерін ұсынды.

Іс-шараға Қазақстан Республикасы Әділет министрлігінің, сот органдарының, адвокатураның, заң ұйымдары мен кәсіби қоғамдастықтың өкілдері де қатысты. Қатысушылар қатарында Қазақстан Республикасы Әділет министрлігінің Заңнама және құқықтық ақпарат институтының өкілдері, Алматы қаласының азаматтық және мамандандырылған ауданаралық экономикалық соттарының судьялары, адвокаттар мен заң консультанттары қатысты.

Дөңгелек үстел қорытындысы бойынша отандық және шетелдік заң ғылымы мен практика өкілдері арасында пікір алмасу өтті. Талқылау азаматтық заңнаманы реформалауды ғылыми тұрғыдан сүйемелдеудің, ғылыми ынтымақтастықты дамытудың және Қазақстан Республикасының жаңа Азаматтық кодексін әзірлеу мәселелері бойынша кәсіби диалогты кеңейтудің маңыздылығын көрсетті.

Өткізілген дөңгелек үстел конституциялық құндылықтар мен қоғам дамуының заманауи талаптары негізінде Қазақстан Республикасының азаматтық заңнамасын жетілдіру жолдары талқылауда заң ғылымы мен тәжірибе қызметкерлерінің өкілдерінің күш-жігерін біріктіретін ғылыми алаңға айналды.